Andri Snær fæddist í Reykjavík á Bastilludaginn, 14. júlí árið 1973. Hann flutti ungur til Seyðisfjarðar, þaðan til Bandaríkjanna þar sem hann var við nám um sex ára skeið. Níu ára gamall flutti hann í Árbæjarhverfið. Hann varð stúdent af Eðlisfræðibraut Menntaskólans við Sund, því næst skráði hann sig í Læknadeild HÍ en komst ekki í gegnum numerus clausus, þá féll hann á persónuleikaprófi flugumferðarstjórnar sem leiddi til þess að hann skráði sig í Íslenskudeild Háskóla Íslands.
Hann gaf æskuverk sín út í ljóðabókinni Ljóðasmygl og skáldarán sem kom út hjá Nykri árið 1995. Haustið 1996 eftir komu út smásögur hans, Engar smá sögur hjá Máli og menningu og Bónusljóð sem vöktu mikla athygli og er ein mest selda ljóðabók síðari tíma á Íslandi.
Hann hefur komið víða við, fengist við skáldsagnaskrif, ljóðlist, leikritun og kvikmyndagerð. Hann hefur hlotið íslensku bókmenntaverðlaunin í öllum flokkum auk alþjóðlegra viðurkenninga. Verk hans hafa verið gefin út eða sýnd í meira en 40 löndum. Andri Snær hefur unnið með margvíslegu listafólki, arkitektum og vísindamönnum og verið virkur í baráttunni fyrir verndun hálendis Íslands. Minnisvarði hans um Okjökul í samvinnu við Rice háskóla í Texas vakti heimsathygli árið 2019.
Andri lauk BA prófi árið 1997. Lokaritgerðin fjallaði um trú í ljóðum Ísaks Harðarsonar og var gefin út endurskrifuð árið 1999 undir heitinu Maður undir himni. Sumarið 1997 vann hann að Nýsköpunarsjóðsverkefni fyrir Árnastofnun ásamt Sverri Jakobssyni. Verkefnið fjallaði um miðlun á handritaarfinum en það var tilnefnt til Nýsköpunarverðlauna Forseta Íslands. Í tengslum við það vann hann ásamt Rósu Þorsteinsdóttir að útgáfu geisladisks sem Smekkleysa gaf út en hann heitir Raddir. Í febrúar 1999 frumsýndi LFMH fyrsta leikverk hans, Náttúruóperan heitir það, Harpa Arnardóttir leikstýrði en hljómsveitin múm samdi og flutti tónlistina við verkið. Um sumarið fékk leikritið Blái hnötturinn þriðju verðlaun í leikritasamkeppni í tilefni af 50 ára afmæli Þjóðleikhússins. Þetta sama ár gerðu Andri og múm saman hljómorðadiskinn Flugmaður sem inniheldur ljóð eftir Andra og tónlist eftir múm.
Sagan af bláa hnettinum hlaut Íslensku bókmenntaverðlaunin árið 1999, Vestnorrænu barnabókaverðlaunin 2002 og Janusz Korkzak heiðursverðlaunin í Póllandi árið 2000, Green Earth Book Awards honorary mention 2013 og UKLA verðlaunin í Bretlandi árið 2014. Bókin er komin út á næstum 40 tungumálum.
Þann 1. janúar árið 2000 kom út Bók í mannhafið sem Andri ritstýrði og sá um útgáfu á. Hafi einhver bókina undir höndum er hann beðinn um að hafa samband. Andri skrifaði skýrslu fyrir Ferðamálaráð sem heitir Leitin að Mónu Lísu.
LoveStar var ein mest selda skáldsaga ársins 2002, hún var tilnefnd til Íslensku bókmenntaverðlaunanna, hlaut menningarverðlaun DV í bókmenntum og var valin skáldsaga ársins af íslenskum bóksölum.
Andri fékk Íslensku bjartsýnisverðlaunin árið 2002.
Draumalandið – Sjálfshjálparbók handa hræddri þjóð kom út árið 2006 og er ein mesta selda bók sem komið hefur út á Íslandi. Hún hlaut Íslensku bókmenntaverðlaunin árið 2006 en kvikmyndin Draumalandið kom út árið 2009 sem Þorfinnur Guðnason leikstýrði í samvinnu við Andra Snæ. Myndin hlaut Edduverðlaun sem heimildarmynd ársins og sló aðsóknarmet í kvikmyndahúsum.
Andri Magnason fékk Kairos verðlaunin hjá Alfred Toepfer stofnuninni í Hamborg árið 2010.
Tímakistan kom út árið 2013 og hlaut íslensku bókmenntaverðlaunin í flokki ungmennabóka. Sofðu ást mín kom út árið 2016. Um tímann og vatnið kom út árið 2019, hún er komin út í meira en 30 löndum og er orðin að kvikmyndinni Time and Water sem leikstýrð er af Söru Dosa en framleidd fyrir National Geographic. Myndin verður fáanleg á Disney+.
Þriðji póllinn, í leikstjórn Andra ásamt Anni Ólafsdóttur var opnunarmynd RIFF árið 2020 og Apausalypse, einnig í leikstjórn þeirra, var frumsýnd árið 2021.
Blái hnötturinn var settur á svið í Þjóðleikhúsinu árið 2001 og hefur verið settur upp í Lucerne í Sviss, tvisvar af YPT theater í Toronto, Akvavit Theater í Chicago, Álaborg í Danmörku, Lahti og Vasa í Finnlandi, Islamabad í Pakistan og víðar. Andri Snær hefur skrifað leikrit með Þorleifi Erni Arnarssyni, Eilíf hamingja (2007) og Eilíf óhamingja (2010) sem voru sett á svið í Borgarleihúsinu og einnig Úlfshamssögu í leikstjórn Maríu Ellingssen sem var frumsýnt í Hafnarfjarðarleikhúsinu 2004.
Andri hefur einnig komið nærri arkítektúr og hönnun, hugmyndir hans um miðborg Reykjavíkur fengu fyrstu til þriðju verðlaun í samkeppni Landsbankans um miðborgina árið 2004 og hann var í teyminu sem hannaði Krikaskóla í Mosfellsbæ. Hann hefur tekið þátt í fjölmörgum samkeppnum og unnið með fjölmörgum stofum, meðal annars Bjarke Ingels Group, BIG í Danmörku. Hann var einnig meðlimur í þverfaglega teyminu sem stóð að verkinu Lavaforming / Hraunmótun sem var framlag Íslands til 19. alþjóðlegu arkitektasýningar Feneyjatvíæringsins árið 2025.
Andri Snær hefur tekið þátt í félagsstörfum, hann var varaformaður Rithöfundasambands Íslands, hefur tekið þátt í neðanjarðarútgáfu ljóðabóka fyrir bókaforlagið Nykur. Hann hefur lesið upp í skólum, haldið fyrirlestra fyrir háskóla, stórfyrirtæki og félagasamtök, skipulagt ljóðakvöld og menningarviðburði eins og Airwords sem var lengi vel bókmenntahluti Iceland Airwaves hátíðarinnar. Hann sat í stjórn Þjóðmenningarhússins ásamt Jóhannesi Nordal og Salome Þorkelsdóttur og hefur átt sæti í stjórn Íslenskrar málnefndar, Þjóðleikhússráði, Rithöfundasambandi Íslands, Menningarmálanefnd Reykjavíkur, Skriðuklaustri á Austurlandi auk þáttöku í hinum ýmsu náttúruverndarsamtökum.
Andri Snær býr í Reykjavík. Kona hans heitir Margrét Sjöfn Torp og þau eiga fjögur börn.
Jötunsteinn – Mál og menning – 2025
Stutt skáldverk um bugaðan arkitekt í borg sem er óðum að hjúpast þverliggjandi bárujárni og jötunstein sem stefnir gegnum bílrúðuna hjá glaðbeittum byggingarverktaka. Máni Snær Þorláksson hannaði bókina en KRADS hönnuðu tvær blokkir og tvö einbýlishús fyrir verkið.
Um tímann og vatnið – Mál og menning 2019
,,Á næstu hundrað árum verða grundvallarbreytingar á eðli vatns á jörðinni. Jöklar munu bráðna, yfirborð hafsins rísa og sýrustig þess breytast meira en sést hefur í 50 milljón ár. Breytingarnar snerta allt líf á jörðinni, alla sem við þekkjum og alla sem við elskum.
Í tilraun sinni til að fanga þetta víðfeðma málefni leyfir Andri Snær Magnason sér að vera bæði persónulegur og vísindalegur – fléttar sér leið að loftslagsvísindunum með ævafornum goðsögnum um heilagar kýr, sögum af forfeðrum og ættingjum og viðtölum við Dalai Lama. Útkoman verður frásögn sem er ferðasaga, heimssaga og áminning um að lifa í sátt við komandi kynslóðir.“
Bónusljóð – Mál og menning 1996, 2003, 2017
Bónusljóð, ein mest selda ljóðabók allra tíma á Íslandi, hefur nú loksins verið aukin, endurunnin, endurskoðuð og endurprentuð til samræmis við ströngustu kröfur neytenda og alþjóðlegra staðla um gæði ljóðmetis. Bónusljóð eru nú einnig fáanleg á ítölsku, þýsku, frönsku og ensku.
Bónusljóð lýsa guðdómlega gleðilegu ferðalagi í gegnum undraveröld Bónusverslunar með viðkomu í aldingarðinum (grænmetisdeildinni) og niflheimi (frystikistur og kæligeymslur) áður en lesanda er svipt af hvítum stormsveip inn í hinn ógurlega hreinsunareld (hreinlætisvörurnar).
Neðanjarðar krókódílarnir í Árósum – Image publishing 2017
Einnar mínútu ljóð sem skoðar og afkóðar Árósa með ljóðrænum augum. Höfundurinn leitar að neðanjarðarkrókódílum borgarinnar, á milli H&M verslana til rúllustiga og vindmyllna til að sýna fram á hversu ljóðrænt hversdagslegt umhverfi okkar getur verið.
Bókin er gefin út í tengslum við verkefnið Fresh Eyes.
Sofðu ást mín – Mál og menning 2016
Barn í Lapplander-jeppa leitar að griðastað fyrir randaflugu uppi á hálendinu, ungur maður leitar að orði sem nær yfir ástina, nýbakaður faðir fer í pílagrímaferð til Lególands og allir draumar rætast þegar fjárfestir kaupir sér risaeðlu og heldur einkapartí með Duran Duran.
Sofðu ást mín geymir sjö raunsæjar og persónulegar sögur eftir Andra Snæ Magnason. Saman mynda þær einlægan streng sem fyllir upp í óvenju fjölbreytt höfundarverk hans.
Tímakistan – Mál og menning 2013
Það sigrar enginn heiminn sem ekki getur sigrað tímann.
Eitthvað furðulegt hefur gerst. Mannkynið húkir í draugalegum kössum og bíður betri tíma. Á meðan hefur skógurinn yfirtekið borgirnar, úlfar ráfa um götur og skógarbirnir hafa hertekið verslunarmiðstöðvar. Hvað kom fyrir? Enginn getur svarað því nema gömul kona sem vakir í einu húsanna. Áratugum saman hefur hún safnað sögum um prinsessuna af Pangeu og föður hennar, Dímon konung, sem í árdaga sigraði heiminn og reyndi að því loknu að sigra tímann.
Draumalandið – Sjálfshjálparbók handa hræddri þjóð – Mál og menning 2006
„Í Draumalandinu víkur Andri Snær af braut fantasíu, bónusljóða og blárra hnatta og ræðst að kjarna stærstu mála samtímans. Allt myndar þetta hraða og spennandi bók sem hrærir upp í heimsmyndinni. Varla hefur nokkur íslensk bók vakið viðlíka athygli og Draumalandið gerði þegar hún kom út snemma árs 2006. Fyrir hana fékk Andri Snær Íslensku bókmenntaverðlaunin 2006. Þá hlaut bókin „Verðlaun verðlaunanna“ árið 2009 í tilefni af 20 ára afmæli Íslensku bókmenntaverðlaunanna.“
Sagan af bláa hnettinum – Mál og menning 1999
Á bláum hnetti lengst úti í geimnum búa ótal börn sem fullorðnast ekki. Þetta eru eiginlega villibörn því enginn skipar þeim fyrir verkum. Eitt kvöldið birtist stjarna á himni sem stefnir beint á þau. Stjarnan lendir í fjörunni með mikilli sprengingu en í reyknum mótar fyrir skuggalegri veru sem starir út í myrkrið. Þá hefst hættulegt ævintýri sem leiðir börnin um myrka skóga, djúpa dali og loftin blá.
Sagan af Bláa hnettinum er komin út á rúmlega 30 tungumálum og hlaut íslensku bókmenntaverðlaunin árið 1999, Janusz Korczak honorary award 2000 og Vestnorrænu Barnabókaverðlaunin 2001. Sagan hlaut Green Earth Book Award árið 2012 og UKLA verðlaunin í Bretlandi árið 2014.
Maður undir himni – Bókmenntafræðistofnun Háskóla Íslands 1999
Maður undir himni er bók sem fjallar um trú í ljóðum Ísaks Harðarsonar, en Ísak er eitt af okkar bestu ljóðskáldum. Bókin er hluti af ritröðinni Ung fræði. Hér er brot úr formálanum:
,,Ég ætla að leyfa mér að setja fram dálitla kenningu. Ég skal ekki dæma um hversu sterk hún er eða frumleg og kannski er hún bara samsvörun í bókmenntasögunni en engin kenning. Ég ætla að halda því fram að kristið skáld sem vill yrkja trúarleg ljóð á ofanverðri 20. öld sé í svipaðri aðstöðu gagnvart yrkisefninu og tungumálinu og skáld á mörkum kristni og heiðni á ofanverðri tíundu öld.“