Jötunsteinn
Útgáfuár: 2025
Tegund: Skáldsaga
Blaðsíður: 126
Þýðingar: Ítalska, enska, danska
Stutt skáldverk um bugaðan arkitekt í borg sem er óðum að hjúpast þverliggjandi bárujárni og jötunstein sem stefnir gegnum bílrúðuna hjá glaðbeittum byggingarverktaka. Máni Snær Þorláksson hannaði bókina en KRADS hönnuðu tvær blokkir og tvö einbýlishús fyrir verkið.
Um tímann og vatnið
Útgáfuár: 2019
Tegund: Almennt efni, vísindi, fjölskylda, minningar
Blaðsíður: 320
Þýðingar: 32 tungumál
,,Á næstu hundrað árum verða grundvallarbreytingar á eðli vatns á jörðinni. Jöklar munu bráðna, yfirborð hafsins rísa og sýrustig þess breytast meira en sést hefur í 50 milljón ár. Breytingarnar snerta allt líf á jörðinni, alla sem við þekkjum og alla sem við elskum. Þær eru flóknari en flest það sem hugurinn er vanur að fást við, stærri en öll fyrri reynsla okkar, stærri en tungumálið. Hvaða orð ná utan um málefni af þeirri stærðargráðu?
Í tilraun sinni til að fanga þetta víðfeðma málefni leyfir Andri Snær Magnason sér að vera bæði persónulegur og vísindalegur – fléttar sér leið að loftslagsvísindunum með ævafornum goðsögnum um heilagar kýr, sögum af forfeðrum og ættingjum og viðtölum við Dalai Lama. Útkoman verður frásögn sem er ferðasaga, heimssaga og áminning um að lifa í sátt við komandi kynslóðir.“
Bónusljóð
Útgáfuár: 1996, 2003, 2017
Tegund: Ljóð
Blaðsíður: 60
Þýðingar: Enska, franska, færeyska, ítalska, þýska
Bónusljóð, ein mest selda ljóðabók allra tíma á Íslandi, hefur nú loksins verið aukin, endurunnin, endurskoðuð og endurprentuð til samræmis við ströngustu kröfur neytenda og alþjóðlegra staðla um gæði ljóðmetis. Bónusljóð eru nú einnig fáanleg á ítölsku, þýsku, frönsku og ensku.
Bónusljóð lýsa guðdómlega gleðilegu ferðalagi í gegnum undraveröld Bónusverslunar með viðkomu í aldingarðinum (grænmetisdeildinni) og niflheimi (frystikistur og kæligeymslur) áður en lesanda er svipt af hvítum stormsveip inn í hinn ógurlega hreinsunareld (hreinlætisvörurnar).
Sofðu ást mín
Útgáfuár: 2016
Tegund: Smásögur, skáldverk
Blaðsíður: 139
Þýðingar: Ítalska, (enskar og þýskar þýðingar óútgefanar)
Barn í Lapplander-jeppa leitar að griðastað fyrir randaflugu uppi á hálendinu, ungur maður leitar að orði sem nær yfir ástina, nýbakaður faðir fer í pílagrímaferð til Lególands og allir draumar rætast þegar fjárfestir kaupir sér risaeðlu og heldur einkapartí með Duran Duran.
Sofðu ást mín geymir sjö raunsæjar og persónulegar sögur eftir Andra Snæ Magnason. Saman mynda þær einlægan streng sem fyllir upp í óvenju fjölbreytt höfundarverk hans.
Tímakistan
Útgáfuár: 2013
Tegund: Barnabók, 9-12 ára
Blaðsíður: 296
Þýðingar: 20 tungumál
Það sigrar enginn heiminn sem ekki getur sigrað tímann.
Eitthvað furðulegt hefur gerst. Mannkynið húkir í draugalegum kössum og bíður betri tíma. Á meðan hefur skógurinn yfirtekið borgirnar, úlfar ráfa um götur og skógarbirnir hafa hertekið verslunarmiðstöðvar. Hvað kom fyrir? Enginn getur svarað því nema gömul kona sem vakir í einu húsanna. Áratugum saman hefur hún safnað sögum um prinsessuna af Pangeu og föður hennar, Dímon konung, sem í árdaga sigraði heiminn og reyndi að því loknu að sigra tímann.
Tímakistan er margslungið ævintýri sem teygir anga sína frá fjarlægustu fortíð til ókominna tíma.
Draumalandið
Útgáfuár: 2006
Tegund: Samfélagsmál, náttúruvernd, orkumál, hugmyndir, hálendið,
Blaðsíður: 304
Þýðingar: 7 tungumál
„Þið skáldin eruð ekki í neinum tengslum við raunveruleikann,“ segir leigubílstjóri við Andra Snæ Magnason í upphafi þessarar frumlegu og makalausu bókar. Skáldið svarar kallinu og fer með lesandann í óvenjulegt ferðalag um íslenskan samtíma. Með því að skoða hlutina frá frumlegu og skáldlegu sjónarhorni lýkur Andri Snær upp algerlega nýrri sýn á kunnuglega hluti.
Í Draumalandinu víkur Andri Snær af braut fantasíu, bónusljóða og blárra hnatta og ræðst að kjarna stærstu mála samtímans. Allt myndar þetta hraða og spennandi bók sem hrærir upp í heimsmyndinni.
LoveStar
Útgáfuár: 2002
Tegund: Skáldsaga
Blaðsíður: 275
Þýðingar: 18 tungumál
Alþjóðlega stórfyrirtækið LoveStar hefur komið Íslandi á heimskortið – markaðssett dauðann, komið skipulagi á ástina og reist stórfenglegasta skemmtigarð sögunnar í Öxnadal þar sem LoveStar blikkar á bak við ský. Indriði og Sigríður eru handfrjálsir einstaklingar í þessu hátæknivædda samfélagi. Þau telja sig hafa fundið ástina upp á eigin spýtur þar til hræðilegt bréf berst frá stórveldinu. Á sama tíma er LoveStar sjálfur um það bil að gera stærstu uppgötvun allra tíma og stemningsdeildin hefur stórfenglegar áætlanir um hvernig megi fullkomna LoveStar veldið. Og tíminn er naumur …
Sagan af bláa hnettinum
Útgáfuár: 1999
Tegund: Barnabók, 5-8 ára
Blaðsíður: 95
Þýðingar: 34 tungumál
Á bláum hnetti langt úti í geimnum búa börn sem fullorðnast ekki. Dag nokkurn birtist vera sem umturnar áhyggjulausu lífi þeirra og leiðir þau í háskalega ferð. Hrífandi og margverðlaunað ævintýri skreytt áhrifamiklum litmyndum Áslaugar Jónsdóttur. Sagan af bláa hnettinum er ein víðförlasta barnabók síðari ára en hún er m.a. komin út á 40 tungumálum – í Bandaríkjunum, Kína, Japan, Grikklandi, Taílandi og Kóreu auk fjölmargra Evrópulanda.
Bókin hlaut Íslensku bókmenntaverðlaunin árið 1999 og „Verðlaun verðlaunanna“ árið 2009 í tilefni af 20 ára afmælis Íslensku bókmenntarverðlaunanna – auk fjölda annarra verðlauna og tilnefninga.
Maður undir himni
Útgáfuár: 1999
Tegund: Ritgerð
Blaðsíður: 102
Maður undir himni er bók sem fjallar um trú í ljóðum Ísaks Harðarsonar, en Ísak er eitt af okkar bestu ljóðskáldum. Bókin er hluti af ritröð sem heitir Ung fræði og kom út hjá Bókmenntafræðistofnun Háskóla Íslands árið 1999.